Mundartlieder us 100 Johr.
Chor Les Marmottes Solothurn mit Dülü Dubach am Akkordeon.

Schwiizer Mundart-Liedgut
Dr CHOR LES MARMOTTES SOLEDURN zieht’s dä Früelig id Richtig vo sine «Wurzle» und är präsentiert – zäme mit em Akkordeonischt DÜLÜ DUBACH – e bunte Schtruuss vo Mund-art-Voukslieder, -Schlager, -Chansons und Mundartrock-Schtück us dr Dütschschwiiz, wo s’«musikalische Grosswärde» vo mehrere Generazione begleitet hei und au bi Jüngere durchus no bekannt und beliebt si. – E vüusitige Pfad dur d’Schwiizermusig vo de letschte 100 Johr.

Voukslieder
Dr JOSEF REINHART (1.9.1875– 14.4.1957) – es Buureching vom Galmis (Rüttene) – het 1897 si erscht Gedichtband «Liedli» veröffentlicht. Vüu vo sine Gedicht si zu «Voukslieder» worde. Dr Stefan Schmid het es paar dervo für mehrschtimmige Chor verarbeitet und die wärde i däm Programm z’ghö-re si.

Schlager
D’Näme vo de Mundartschlager-Macher kennt me vilech hütt weniger als iri Lieder: Dr ARTUR BEUL (1915–2010) het z.B. aus Lehrer säuber afo Lieder schriebe, wüu’s denn no chuum Lieder für Jugendlichi gäh het. So isch eis ent-schtande, wo hütt jedi Soledurner Fasnächtlerin kennt: «Übere Gotthard flüged Bräme». Bereits als 18-Jährige het er si gröscht Erfoug gschribe: «Am Himmel stoht es Stärnli». Mit «Nach em Räge schint d’Sunne» het er sogar e Wäuthit glandet. Dr Bärneroberländer CHRISTIAN BOSS (1926–1987) het 1948 au e beliebte und hütt no ghörte Evergreen gschribe: «S’Träumli». Au dr HAZY OSTERWALD (1922–2012) und sis Jazz-Sextett kennt me hütt no – immer wider ghört me ne: Dr «Kriminal-Tango». Das Lied isch zwar nid Mundart, sondern ursprünglech italiänisch, passt aber trotzdäm…

Bärner Chansons
Wär könnt der MANI MATTER (1936–1972) nit? – Äuä chuum öpper! Em Bärner Liedermacher sini – so eifach wie tiefgründige – Lieder hei hütt Kult-Schtatus und wärde i bewundernswärter musikalischer Breiti bearbeitet und gsunge. Mir singe es paar Lieder, wo u.a. dr Stefan Schmid für Chor gsetzt het.

Mundart-Rock
Ir Schwiizer-Musig-Szene kennt me vüu rockigi Lieder, MusikerInne und Gruppe. E chlini Uswau dervo überchunnt au i däm Programm si wouverdienti Platz: PATÄNT OCHSNER, dr POLO HOFER, SPAN und dr DÜLÜ DUBACH (us Deitige) füeren üs uf dere musikalische Reis dür die letschte 100 Johr wider id Gägewart.

Abschiedskonzert
Dr Stefan Schmid us Biberischt isch sit über 15 Johr Dirigänt vo de Marmottes und het üs und üsem Publikum i derä Zyt gar mängs schöns, fägigs und berüehrends Musigerläbnis bschärt. «SWISS MADE» isch jetz aber sis letschte Programm mit üs und für euch. – Fröie mer üs druf!

Daniel Kradolfer, Solothurn

Konzerte
Samstag, 4. Mai 2024, 19.30 Uhr, Ref. Thomaskirche Biberist-Gerlafingen
Sonntag, 5. Mai 2024, 11 Uhr, Säulenhalle Landhaus Solothurn

Kollekte, Türöffnung: max. 45 Minuten vor Beginn